Podcast “Gréng op den Oueren”

Episod 19: Ëmweltschutz an der Stad Lëtzebuerg

Wat bedeit Ëmweltschutz eigentlech am Alldag vun enger Stad?

De Pierre Schmitt, Délégué à l’Environnement vun der Stad Lëtzebuerg, gëtt eis en Abléck an d’Aarbecht hannert de Kulissen.

Mir schwätzen iwwer Loftqualitéit, iwwer den Opbau an d’Organisatioun vum Service Environnement an doriwwer, wéi och grouss Eventer ëmmer méi nohalteg an ëmweltfrëndlech organiséiert ginn.

Eng spannend Episod iwwer déi vill Facettë vum Ëmweltschutz an eiser Haaptstad.

Lauschtert eran a gitt “gréng op den Oueren”!

Episod 18: Nohalteg Bauen

Wann ee Gebaier plangt – wou kënnt d’Nohaltegkeet eigentlech an d’Spill?

Dës Fro stelle mir der Martine Schummer vu Schroeder & Associés an dëser Episode vu Gréng op den Oueren.

Wat bedeit „nohalteg“ iwwerhaapt? Ass et nëmmen eng Fro vum Bauen – oder eng ganz Aart a Weis ze denken?

Lauschtert eran an entdeckt: e Gebai ouni Dieren, nohalteg Approchen am Alldag – an eng Crèche, déi am ganze Land bekannt ass.

Lauschtert eran a gitt “gréng op den Oueren”!

Episod 17: Sonn fir jiddereen: Zesumme Stroum deelen

Wat wier, wann een zesumme mat sengen Nopere kéint Energie deelen?

Wat op deem éischte Bléck ongewéinlech kléngt, ass haut Realitéit. Mat de sougenannten Energy-Sharing-Gruppen ass et elo méiglech, zesumme mat den Noperen an och mat klénge Betriber Energie ze deelen.

Zesumme mam Fenn Faber a Gilbert Théato vun der Klima-Agence, souwéi mam Tatiana Berseneva vun Enovos, kucke mir hannert d’Kulisse vun dësem spannende Konzept, bei deem och dir dobausse kënnt matmaachen.

Lauschtert eran a gitt “gréng op den Oueren”!

Episod 16: Mam Wandrad vun der Zäit goen

Et ass faszinéierend: Ee Wandrad muss just eemol dréinen, an et kënnen direkt bis zu 10 Batterien vun Elektro-Veloen opgelueden ginn.

Trotz hirem Potenzial ginn et nach Suergen – wéinst Lautstärk, Landschaftsbild oder Naturimpakt. Wéi vill dovun ass nach haut berechtegt? De Paul Zeimet vu SOLER – eisen Invitée an dëser Episode vu Gréng op den Oueren – geet genee dëse Froen no.

Hie verréit, firwat och d’Gemengen eng wichteg Roll spillen, firwat d’Wandrieder net rosa däerfe sinn a wéi de Grand-Duc reagéiert huet, wéi e Wandrad bei sengem Schlass opgeriicht gouf.

Lauschtert eran a gitt “gréng op den Oueren”!

Episod 15: Nohalteg ënnerwee mat der CFL

Wéi verbënnt ee Mobilitéit mat Nohaltegkeet? Bei der CFL ass dat méi wéi just eng Fro – et ass eng Missioun. Vun erneierbaren Energien bis zu grénger Infrastruktur: déi national Eisebunnsverwaltung beweist, dass Transport an Ëmwelt keng Géigesätz musse sinn.

Vun Innovatiounen, iwwer Strategien an Ëmweltbewosstsinn, schwätzt de Max an dëser Episod mam Sandy Nonnweiler, CFL-Pressespriecherin, an dat direkt aus dem Zuch eraus. Donieft geet et och ëm de PPA-Projet tëscht der Enovos an der CFL.

Lauschtert eran a gitt « gréng op den Oueren »!

Episod 14: Green Events

Egal ob Festival, Sportsevent, Dëppefest oder Marche Gourmande – Eventer spillen eng wichteg Roll an eiser Gesellschaft. Ma wéi kënnen se nohalteg organiséiert ginn? Doriwwer schwätze mir an dëser Episod mam Oekozenter Pafendall an der SuperDreckskëscht.

Ee weidere Gaascht ass de Max Pesch aus dem Organisatiounscomité vum e-Lake Festival. Hien erkläert, firwat sech de Festival op de Fändel geschriwwen huet, sech och ëm de Label vum Green Event ze beméien.

Lauschtert eran a gitt « gréng op den Oueren »!

Episod 13: Waasserstoff – En Deel vun der Energiezukunft

Waasserstoff – eng Technologie mat Potential.

An dëser Episode kréie mir en exklusive Bléck op d’Chancen an d’Hierstellung vum Waasserstoff vum Yves Reuter, Chef Projet am Beräich Waasserstoff bei Enovos. Zousätzlech hu mir de Jean-François Schneiders, Strategy, Markets & EU Regulations bei Creos ageluede fir seng Expertis iwwert déi national an europäesch Strategië mat eis ze deelen.

Lauschtert eran a gitt « gréng op den Oueren »!

Episod 12: Biodiversitéit a Photovoltaik : Hand an Hand

Solar-Stroum produzéiere matten an der Natur an zäitgläich d‘Biodiversitéit ënnerstëtzen – geet dat zesummen?

An dësem Episod schwätze mir iwwer 2 verschidde Konzepter – engersäits iwwer Agri-PV, woubäi d’Landwirtschaft an d’Energieproduktiounsanlag sech ënnerstëtzen an anerersäits iwwer eng schwammend PV-Anlag op engem Baseng – en eemolege Projet mat Iwwerraschungen.

Dofir waren de Patrick Jeitz an den Eric Golinelli bei eis an hunn  iwwer d’Challenges an d’Chancë vun sou Anlage geschwat. Och den Expert Pierre Kalmes vum Büro d’Etudes efor_ersa huet iwwer hir Beobachtunge bericht.

Lauschtert eran a gitt « gréng op den Oueren »!

Episod 11: Fraen an der Welt vun der Energie

An dësem Episod dréit sech alles ëm d’Fraen an der Welt vun der Energie: Wéi ass et als Fra am Secteur ze schaffen? Mat wat muss ee rechnen? Wou hunn sech Aarbechtskonditioune verbessert? A wou muss nach eppes geschéien?

Mam Laurence Zenner, CEO vu Creos, mam Anouk Hilger, Head of Renewables bei Enovos, mam Laetitia De Oliveira, Project Manager am Beräich Logistic Support bei Creos a mam Lara Gensous, Project Manager am Beräich Renewable Energies bei Enovos, bléckt de Max e bësse méi kritesch hannert d’Kulisse vun der Energiebranche.

Lauschtert eran a gitt « gréng op den Oueren »!

Episod 10: Smart Doheem

An dësem Episod dréit sech alles ëm Smart Homes: Wat mécht een Haus eigentlech « smart »? Wat kann ee mat der neier Technologie alles maachen? A virun allem, ass et just en « Nice-to-Have » oder kann ee mat der Smart-Home-Technologie wierklech Geld an Energie spueren?

Doriwwer schwätzt de Max mam Laurent Saeul, Administrateur délégué vu Minusines. Mee net nëmmen dat: Hie geet och live op e Chantier! De Charel Lentz baut nämlech grad een neit Haus. Bausse mat vill Holz a bannen… eebe smart.

Lauschtert eran a gitt « gréng op den Oueren »!

Episod 9: Startups mat Fokus « Energie »

De Label « Made in Luxembourg » bedeit net onbedéngt ëmmer Kachkéis oder Cremant, heiansdo bedeit et och « Innovatiounen ». An dësem Episode bléckt de Max hannert d’Kulisse vun 3 innovative Start-Ups aus Lëtzebuerg, déi am Beräich vun der erneierbarer Energie ënnerwee sinn. Dofir begréisst en och direkt 3 Invitéen: de Grégory Nain vun Datathings, de Xavier Kohll vu Circuli-ion an de Christophe Timmermans vu SolarCleano. Digital Zwillingen, Wäschroboter vu PV-Anlagen a Batterien, deenen een zweet Liewe geschenkt gëtt: vill Spaass mat spannende Lëtzebuerger Success-Stories.

Lauschtert eran a gitt « gréng op den Oueren »!

Episod 8: Energie Myth Busters

An dësem neien Episod gëtt de Max zum MythBuster, oder wéi hien et seet: Hien erfëllt sech e klengen Dram a moderéiert „X-Faktor, das Unfassbare“. Also op d’mannst bal.

Froe wéi « Gëtt et am Wanter méi séier waarm doheem, wann ech d’Heizung direkt op 5 dréinen? Verbraucht mäi Frigo méi Energie, wa méi Saachen dra sinn? A muss ech mäi Bakuewe wierklech waarm maachen ier ech lassleeën? » goufen de Leit an der Foussgängerzon an der Stad gestallt. De Max geet de bekanntste Mythen op de Grond a probéiert mat der Hëllef vum Laurent Melchior vun Enovos d‘Léisungen dozou ze fannen.

Lauschtert eran a gitt « gréng op den Oueren »!

Episod 7: Stroum doheem produzéieren

Energie ass iwwerall ronderëm eis. Et muss een se just afänken. No dësem Motto kucke mir an dësem Episod, wéi jidderee vun eis net nëmme selwer Stroum produzéiere kann, mee duerch Autoconsommatioun och säi Bäitrag fir eng nohalteg Zukunft leeschte kann.⁣

De Sasan Rafii ass Co-Fondateur a Gerant vu Letz Green Renewables, déi Photovoltaik-Anlage bauen an de Leit et erméiglechen, hire Stroum sou vill wéi méiglech selwer ze notzen. Hien erkläert ënner anerem, op wat een oppasse muss, wann een eng PV-Anlag installéiere wëll, a wéi en « Smart » Doheem hëllefe kann, d’Energie ideal anzesetzen. De Laurent Melchior vun Enovos mécht d’Theorie hannert de PV-Anlage méi gräifbar a weess, wéi eng Optiounen et gëtt, fir d’Lag vum Daach ideal auszenotzen. D’Sarah Juchems vun der Klima-Agence gëtt Detailer zu de verschiddene Subventiounen, déi een bei esou engem Investissement zegutt huet.

Lauschtert eran a gitt « gréng op den Oueren »!

Episod 6: Erneierbar Energie fir Lëtzebuerg

Wandenergie, Solarenergie, Waasserkraaft. Et gëtt vill verschidde Manéieren, fir nohalteg Stroum ze produzéieren. Wéi eng Entwécklung huet déi gréng Energie iwwert déi lescht Joren zu Lëtzebuerg gemaach? A wéi kënne Betriber an och Privatleit hëllefen, fir d’Energietransitioun virun ze dreiwen?

D’Anouk Hilger ass bei Enovos Responsabel fir d’Departement vun den erneierbaren Energien a gëtt an Abléck an déi grouss Projeten, déi Enovos scho jorelaang ëmsetzt – vun der Ëmweltetude ganz um Ufank iwwer d’Konstruktioun bis bei d’Exploitatioun. Donieft kréie mir vun engem iwwerzeegte Privatnotzer Tuyauen, op wat een oppasse muss, wann ee sech doheem eng Anlag installéiert, a wat d’Virdeeler vu gréngem Stroum sinn.

Lauschtert eran a gitt « gréng op den Oueren »!

Episod 5: Liichtverschmotzung

Kënschtlech Luucht huet méi e groussen Afloss op Mënsch an Déier, wéi ee mengt. Kann et sinn, dass mir eis d’Welt méi hell gemaach hunn, wéi se eigentlech misst an dierft sinn?

Mir sinn dës Kéier op Besuch beim Liichtberoder vum Naturpark Our. Den Daniel Gliedner erkläert eis ënner anerem, firwat d’Thema an de leschte Joren ëmmer méi Gewiicht kritt huet, wéi d’Stroossebeliichtung nei geduecht ka ginn a wat fir positiv Effekter et dobäi fir d’Gesondheet gëtt. Den Tiago De Sousa, Chargé d’études bei der Naturverwaltung, seet eis, wéi d’Problematik national an international an Ugrëff geholl gëtt. An de Laurent Melchior vun Enovos gëtt praktesch Tuyauen, fir net nëmme Luucht, mee och Energie ze spueren.

Lauschtert eran a gitt « gréng op den Oueren »!

Episod 4: Klimafrëndlech liewen

Et gëtt kee bessere Moment, fir seng Gewunnechten z’änneren, wéi den Ufank vum Joer.⁣ Besonnesch déi kleng Gesten a Schrëtt kënne vill bewierken, och am Hibléck op d’Klima.⁣⁣⁣ ⁣⁣⁣ Mir sinn dës Kéier ënner anerem op Besuch beim CELL. D’Delphine Dethier an den Norry Schneider zielen eis, wéi wäit d’Transitiounsbeweegung et no 12 Joer scho bruecht huet a wat déi grouss Erausfuerderunge fir déi no Zukunft sinn. Mir luussen och beim Estelle Flammang am Buttek Onperfekt zu Maarnech eran, hannert deem eng Initiativ stécht, déi sech fir lokal a saisonal Liewensmëttel staark mécht. A vun Enovos gëtt et einfach Tuyauen, fir Energie ze spueren, woubäi de Klient-Portal my.enovos och eng wichteg Roll spillt.

Lauschtert eran a gitt « gréng op den Oueren »!

Episod 3: Energetesch renovéieren

Et muss net ëmmer nei sinn. Renovéiere kann och eng Optioun sinn, besonnesch wann ee Wäert leet op Klimaneutralitéit an Energieeffizienz. Mir sinn op Besuch beim Ben Birkel zu Hitten, deen d‘Scheier renovéiere gelooss huet, déi viru bal 100 Joer vu sengem Grousspapp gebaut gouf. Mat dobäi ass den Expert Marc Neu. Hie bedreift en ökologesche Baustoffhandel an ass schonn iwwer zwee Joerzéngte laang am Energieberäich täteg, ënner anerem als Energieberoder. Am Gespréich mat der Klima-Agence raume mir donieft op mat Virurteeler ronderëm energetescht Renovéieren a loossen eis vun engem Simulator ënner d’Äerm gräifen. A vun Enovos gëtt et praktesch Detailer zu den enoprimes, déi jiddereen ufroe kann.

Lauschtert eran a gitt « gréng op den Oueren »!

Episod 2: Nohaltegt Bauen

Wéi plangt een en Haus, wann ee klimaneutral an energieeffizient wëll bauen? An op wat muss ee besonnesch gutt oppassen, fir dass de Projet e Succès gëtt?
Beim Max Pesch ass de Wonsch vun engem Holzhaus mat engem héijen Ecostandard Realitéit ginn. Mir maache mat him zesummen en Tour duerch d’Haus a ginn ë.a. gewuer, wat eng Lehmmauer matzen an der Stuff fir Virdeleer huet a wéi eng Roll d’Photovoltaik ka spillen. Donieft gëtt et Tipps vum Sarah Juchems vun der Klima-Agence a puncto Subventiounen, an och Besuch vun enger Influencerin.

Lauschtert eran a gitt « gréng op den Oueren »!

Episod 1 : Grénge Stroum zu Lëtzebuerg

Hunn ech grénge Stroum? Wann jo, wou kënnt en hier?

De Max huet sech mat 3 Experte getraff.

• mam Roger Rütze- Expert fir Green Portfolio zum Thema grénge Stroum  an zum Energie-Mix,
• mam Alain Hübsch, Head of Market Operations zum Energie-Akaf,
• mam Germain Emeringer, Responsabel fir residentiell Client’en et kleng Entreprisë geheie mir e Bléck hannert d’Kulisse vun der Servcieline.

An dësem Podcast kritt dir och Informatiounen zou verschiddene Primmen an och Energiespuertipps.

Lauschtert eran a gitt « gréng op den Oueren »!